Sanggamara - Deureujat

Derajat dan kedudukan manusia adalah sama di mata Tuhan

Manusia geubagi lhee
haba teuntee kheuen juara

Peutama phon ureueng ulee

nyankeuh sukee raja-raja

Ureueng kaya top meunalee
deungon guree biek ulama

Nyang le kawom mupeureudee

masa dilee cit geuthee na

Nyang keudua pangkat alang
kon nyang manyang kon nyang hina

Kon nyang kaya gasien pih tan

wareh kawan dum sikada

Keu sidadu uleebalang
nyampang na prang soe tueng kuta

Meunyoe gagah ceubeueh tungang

geuboh gobnyan keu panglima

Ureueng iku pangkat keulhee
nyang tan akai ngon bicara

Hana kawom tan eleumee

tan gob keunai pane teuka

Cit hana buet jeub-jeub watee
lam teumipee cue hareuta

Bak tiep-tiep syoe hana guree

tan jitiree buet nyang beuna

Ma'siet sabe hana padee
ija bajee meujan hana

Nyang tan wareh mupeureudee 

gasien teuntee tan hareuta

Hana adab deungon malee
hana jithee reusam donya

Ya Tuhanku neupesilee

nibak sukee ureueng hina

Pangkat dan Laqab

Nyang tuanku biek seuluthan

raja alam Atjeh Raya

Ureueng binoe geulakab nan

Teungku Mehran nyan umpama

Na nyang pocut geupanggelan

inong agam tuha muda

Timu barat nyang sukee nyan

tan geupeunan ngon laen gla

Keuchiek Waki dum sinaroe

bak gampong droe geukuasa

Di Peutua saboh bagoe

seuneubok droe na kuasa

Pangkat Imeum bak mukim droe

na lhee bagoe maseng tangga

Uleebalang nyang mat nanggroe

mise jinoe le umpama

Nyang mat adat seukalian

nyang peutimang manusia

Pangkat imeum uleebalang

pangkat alang sang peutua

Keuchiek waki panglima prang

panglima blang ngon bentara

Geukheuen Teuku dum sibarang

meuyub manyang sama rata

Bak teumpat nyan han get ragam

ka roh saban cut ngon raya

Dudoe teuma teuka reusam

Po lontuan geuseubut gla

Teuku ampun saboh macam

nyang jeud meunan meunoe mula

Jan meusapat meuduek sajan

uleebalang pih na dua

Phon teuku Ba duaplhoh nam

sajan rakan dum panglima

Ureueng tuha bak kawan nyan

Ta geupeunan le bicara

Nyang keudua Ha budiman

uleebalang Teupinraya

Tari-tari bandum rakan

jroh peukayan hibat rupa

Ngon keuchiek La nyang analan

bak meukalam cit juara

Jan deungon Ba Ta meukalam

po lontuan geuseubut gla

Nyang makna Po raja maqam

nyang Lontuan nyakni hamba

Dua teuku hanle bimbang

nyang jaweueb nyan hak teuku Ba

Jan La ngon Ba jimeukalam

laen ragam lom jiboh gla

Jilaqab nan Teuku ampon

get meualon deungon makna

Surah sinan ka jikandong

nyakni ampon nyang jipinta

Uleebalang geukheuen ampon

peutama phon ureueng teuka

Seubab adat hana muphom

jeub-jeub gampong cit hana sa

Reusam adat jeub-jeub gampong

laen suson haloih gasa

Salah banja han meuturon

harap ampon bek na dosya

Lagi sinan jipeuri soe

nyang raja droe na jibiza

Po lontuan keu raja droe

nyang mat nanggroe ulee nuga

Jeud cit ngon Po roh sibagoe

he samlakoe hana ceula

Ngon Teuku po jeud cit meunoe

pileh keudroe toh nyang suka

Takheuen Ampon keu raja droe

meunyo adoe sang mureuka

Hana ceula hana pujoe

ureueng nanggroe jeud bandua

Masa jinoe ka roh saban

lua dalam hanle biza

Keu barangsoe uleebalang

keurabat nyan dum barang na

Teuku ampon Po lontuan

muliaan cit bandua

Umpama na aneuek agam

jeud laqab nyan hana ceula

Tan geuceula nibak adat

jeud talaqab peue nyang suka

Boh meuseuki hana pangkat

bak deurajat biek mulia

Turon muron bak jad bajad

bak martabat nyang geupuja

Teutapi kon nyang jarak that

ingat beuthat pileh banja

Pangkat Pocut seukalian

biek seuluthan kawom raja

Nanggroe Pidie tueng teuladan

cok pangkat nyan geupeuguna

Teutapi kon ureueng barang

kon nyang alang sang peutua

Malenkan Po uleebalang

nyang turonan biek mulia

Aneuek inong uleebalang

Pocut Intan mise nama

Meukawen ngon uleebalang

geulaqab nan Pocut dumna

Laen binoe uleebalang

ureueng barang beuthat kaya

Geukheuen Cupo muliaan

meunan nyang trang kheuen 'arifa

Pangkat Cutnyak he budiman

nyang bangsawan asai mula

Aneuek raja uleebalang

nan Cut Intan masa dara

Meukawen ngon uleebalang 

Cutnyak Intan geupeugla

Meunyoe binoe ureueng barang

nan Cut Intan ka mumada

Uleebalang geumeukawen 

ngon sinyak Ben gampong Lam Nga

Aneuek Bang Lah mugee kareng

rupa canden bijaksana

Pangkat gobnyan kon Cutnyak Ben

beuthat malem deungon kaya

Geulakab Nyak hana laen

ngon Cutpo Ben sebut nama

Tapi jinoe le that laen

'oh teuka Kleng rame Cina

Troih Meulayu Mandahileng

bangsa aseng deungon Jawa

Bandum inong dikheuen Cutnyak

nyang meusigak tuha muda

Di inong nyan pih ka galak

meuhayak ngon ulee dada

Jibloe ie kreueh deungon beudak

jibloe ceulak boh bak mata

Beuthat meuhai han jitulak

seubab galak raya nama

'Oh troih Jawa ngon Meulayu

jikheuen Teungku ban sineuna

Beuthat bangsat mise Badu

jikheuen laju han jikira

Si meukaha saboh laku

peue nyang napsu jikheuen lanja

Asai na peng ngon bloe breueh bu

bloe naleueng grue eumpeuen guda

Jikheuen Ampon keu si Abu

get meulaku ngon suara

Han jipike meung sigitu

di si Abu pih jirizla

Nyoe lon peugah pangkat Teungku 

bak Meulayu dilee kata

Asai bak kata Tuanku 

geukheuen Teungku paneuek haba

Bangsa raja nyang meusyeuhu

geukheuen teungku nyang mulia

Troih u Atjeh barat timu

pangkat Teungku geupeuguna

Peutama phon nyang bangsawan

dilikot nyan keu ulama

'Alem nahu manthek hikam

'aruzl bayan ngon fuqaha

Jeud tafeuse kalam Tuhan

hadis sajan meune teuka

Mise qadli uleebalang

nyang peutimang syara' donya

Geukheuen Teungku muliaan

meujeulisan bek kheuen nama

Nyang keudua lom meu ubah

deungon titak nibak raja

Geukheuen Teungku bak meunasah

ngon bak deyah bale raksa

Jeub-jeub gampong meusyeuhurah

nyang tueng pitrah ka meuhingga

Beuet teuleukien tueng seudeukah

nyang peunikah agam dara

Nyang peureunoe kitab fiqah

gobnyan peugah salah beuna

Deungon izin raja nanggroe

tueng pangkat nyoe nyan keureuja

Cit tan geubri keu barang soe

'oh jinoe ka laen rupa

Masa jinoe laen macam

bak lon pandang jeub-jeub desa

Na peuet uroe jak meudagang

ngui peukayan sang ulama

Geukheuen teungku galak hanban

taeu keumang bulee ruma

Tundok ulee jan meukalam

su meudalam bak geukheuen ra

Nyang that paseh ensya Allah

alhamdulillah nyang keudua

Nyang kayem that seubut Allah

panyang nafaih lhok peurasa

Bak kheuen Teungku pih that ceudaih

masya Allah hana lupa

Sad deungo Ra qari leupah

soe nyang juah geukheuen saba 

Keu eleumee han peuduli

asai kari peugah haba

Woe ugampong jak teumaki

jan khanduro jak dimuka

Fatihah bu apam ruti

cit ka qari hafai lanja

Roh na inong tari-tari

geukheuen haqqi dalam dada

Keunong tipee bapa abi

jok esteuri teungku muda

Aneuek keuchiek deungon waki

aneuek Nyak Ni ureueng kaya

Geujok caram peukong janji

buleuen haji meukeureuja

Le that meunan he ya akhi

han peuduli ban nyang banja

Salah sangka ka turotan

tueng teuladan ureueng teuka

Han jipileh ban atoran

dipeusaban cut ngon raya

Sinan harap ulon tuan

ban timangan teungku dumna

Bak lon pike keusudahan

teubiet macam laen rupa

Meung tan hilah deungon lawan

akan datang tan hareuga

Pangkat Teuku leubee alang

ngon boh mancang han geutuka

Teuka ada laen macam

kheundak alam ka meuputa

Catatan:

Bait syair Aceh di atas adalah bagian 5 dan bagian 6 buku syair Aceh Sanggamara karangan Teuku Mansoer Leupung yang diterbitkan oleh Teuku Mansoer Foundation, Jakarta, 1970.