Sanggamara - Hukom

Syariat Islam membimbing manusia ke jalan yang lurus

Hukom bak Syiah Kuala

Hukom syara' nyang that suci

hukom Nabi nyang agama

Boh agama baranggari

hadits Nabi kheuen ulama

Get meu-ato dum ka meukri

bab meusuci ngon puasa

Bab peurae peusah wali

hukom ta'zir ngon diet luka

Bab bloe-publoe ka meubagi
ngon bab haji ka meuhingga

Bab meuzina lueng meunalee

bab teumipee cue hareuta

Bab horeumat adab guree
ka meuteuntee daulat raja

Ka meu-ato dum meuteuntee

maseng pasai ka meujeumba

Meuri sunat ngon peureulee
meujan watee meukri tanda

Haleue hareuem dum ka meuhat

pasai ngon bab han meutuka

Ka meuteuntee dalam kitab
nyampang silap peunyata

Jan mupake na khuseumat

tapileh bab tapereksa

Adat syara' hukom saban
ngon peutimang manusia

Jan na dakwa bandum ensan

ngon jalan nyan jih geupubla

Geuboh hakim soe peutimang
nyang peuseunang jeub peukara

Hakim adat tuan-tuan

uleebalang ngon peutua

Hakim syara' Teungku qadli
nyang mufeuti bab agama

Kalam Allah Hadis Nabi

kheuen Bukhari ngin Muslima

Kata sahbat ngon tabi'i
kheuen jauhari ngon ulama

Kata Ahmad ngon Rameuli

kheuen Ghazali nyang mu'tabar

Keusalahan ceula ngon upat
dua tempat asai mula

Peutama phon nibak adat

han tatupat haloih gasa

Reusam kanun han ta ingat
banja adat han takira

Meujeulisan sabe silap

nyankeuh seubab roh cereuca

Nyang keudua hukom Tuhan
lam Qureuan asai punca

Hadis Nabi nyang jonjongan

salah sinan pi geuceula

'Oh gob ceula juah kon le
tamupake han takira

Na nyang luka darah ile

na nyang mate nyawong pahna

Bak teumpat nyan cuba pike
bek sigra le mirah mata

Cuba timang dalam hate

cuba syawer pileh punca

Mise geukheuen le Lem Dulah
deungon lidah geupeunyata

Pakon beungeh roh meureupaih

ngon Lem Dulah peue kareuna

Peue na jana bak geupeugah
ciba ulah bak meujeumba

Nibak adat gata salah

Dalem Dulah nyang peunyata

Meunyoe ceubeueh gata kuat
jak cang kita nyang peuhaba

Ngon Lem Dulah han sapeue bab

tan geu upat ateueh gata

Mise judi nyang geularang
le jonjongan Nabi kita

Pakon teungku takeumeueng cang

nyampang geutham geupubeuna

Nyang hak teungku cit geupuetrang
buet nyang larang bak agama

Meunyo gata kon eseulam

tot Qureuan dalam donya

Meunan cit lom nama pujoe
bak dua syoe asai mula

Soe nyang turot adat nanggroe

cit meubudhoe bijaksana

Hukom syara' dum seuleusoe
geumeurunoe bak ulama

Dalam kitab dum sinaroe

sinan pujoe han mureuka

Tatimmah

Lon boh mise nak tatukri
tueg keu dali cok umpama

Adat hukom lon peuturi

ateueh biti tan meuriba

Mise aneuek Lemcut Dulah 
nan si Andah aneuek muda

Bak si uroe roh mubantah

bak meunasah jimeudakwa

Ngon Teuku Cut jimeureupaih
ka meudarah aneuek raja

Bak uroe nyan geupeusiblah

jok si Andah ubak tuha

Uroe rabu ba bak qadli
nyang mufeuti bab agama

Geuhukom diet ban kheuen Nabi

hana meusie ube seuma

Ban nyang ato bak Syafi'i 
kheuen Bukhari ngon Muslima

Banja adat kheuen penghulee

phon sibungkai riyeue ta ba

Hareuga diet adat teuntee
pakri nyang mee han meutuka

Ija puteh saboh kayee

meunan dilee nyang biasa

Ngon bu leukat teuma keulhee
boh bak ulee meusampeuna

Bak tuha peuet kheuen daseuto

geundrang tambo bak seureuta

Teubee ngon u dum ta ato
bak ureueng le dum tayu ba

Job seurune bak meu-o-o

mise linto woe bak dara

Lam bu leukat tampoe bak le
mangat seu-o aneuek miet ba

Di ateueh nyan manok panggang

wareh rakan ireng dumna

Wareh kawom dum sibrang
beungoh nanyan jak bak raja

Ngon Nyak Andah ta ba sajan

nyang atoran dilee nyang ka

Hate raja tapeuseunang
seuon tangan bak keupala

Tuha lapan lom peugah kri

reusam tabri tapeusuka

Nak bek marah Pocut Sitti
boh lam guni riyeue ta-ba

Beuthat sihaih ija tabri

nyang tarawi bak mubanggla

Bu paga glong mupeulangi
salah sari ngon wareuna

Teubee bunoe bek taboh on

u teulason nam boh pansa

Bak meusujoe ngon lapek glong
meukasab mbon seuhab sutra

Mangat suka teuku ampon

bek sang seudong ji-ek bisa

Keu ibarat ureueng gampong
bek jipeukong raja-raja

Nibak imeum tron peurintah

ureueng ceudaih cit jeunasa

Umu tuha lagi meugah
tungang gagah lagi kaya

Peue nyang geukheuen tan soe bantah

hana salah ateueh banja

Geukheuen he nyak nyoe lon peugah
jan talangkah ubak raja

Dum atoran tapeucukop

nyang dilikot bek dimuka

Ateueh qanun bek na karot
bak mupatot ateueh kada 

Nyang jak dikeue bek dilikot

beutatakot keu ceureuca

Nyang hak tuha bek roh tulot
bak meuatot dum meujeumba

Ureueng tuha dihadapan

dilikot nyan neumee gata

Ureueng salah lheueh halangan
dilikot nyan dum saudara

Ureueng tuha beu-ot tangan

ampon laman kheuen bak nyata

Mumat jaroe duek meusumpan
ngon meukalam dum mumada

Kheuen Nyak Makam nyang jauhari

bak seudati nyan keupula

Nyang peutua bak rapa'i
bak seueng judi cit juara

Aneuek muda dum barangri

tan jiungki peue nyang sabda

Han mubantah deungon akhi
get that budi tuto kata

Jimeututoe deungon rakan

peungajaran na seureuta

Ateueh banja meujeulisan
he budiman deungo rata

Singoh beungoh uroe nanyan

tuha lapan lakee gata

Si Nyak Andah jak peukawan
jak com tangan teuku tuha

Tajak manoe bek meukalang

ngui bee-beewan minyeuek ata

Bek bak gigor meugeuratan
lom bek masam ngon ie muka

Nyampang taduek bak meusumpam

bek meuligan bajee ija

'Oh tameungui bak meuragam
ngui peukayan nyang get rupa

Teuku ampon po lontuan

jan meukalam deungon raja

Nyankeuh mise ka neutukri
tueng keu dali cok umpama

Bek meusalah ateueh biti

nak bek meusie ateueh banja

Ateueh ureueng meuyub pangkat
hukom adat ka mumada

Rayeuek bacut bak deurajat

geumupakat ureueng tuha

Boh daseuto bacut sapat
kon nyang leungkap mise raja

Bacut reusam lom geusambat

maseng babat ateueh kada

Na nyang geuba bak meunasah
bandua blah keunan teuka

Na lam balee muhakkamah

na nyang meu'ah bak peutua

Jan tateubiet bak makam droe
ingat adoe bek ceureuca

Reusam adat jeub-jeub nanggroe

tan sibagoe han sirupa

Mita tuha ureueng raghoe
nyang meubudhoe le bicara

Tapareksa dum tiep-tiap syoe

bek jan rugoe keuji nama

Masa gata lam pahok nyan
adat sinan tapeuguna

Bek taceula he budiman 

beutatimang 'uruf donya

Nanggroe gata keuceulaan 
bak nanggroe nyang roh mulia

Bek that hireuen hate bimbang

ban nyan reumbang turot saja

Boh meuseuki lam hai nikah
turot titah ban kheuen tuha

Adat gata bek tapeugah 

han geupeuasah le peutua 

Baca bagian selanjutnya Deureujat dan Laqab

Catatan:

Hikayat di atas adalah bagian 5 dan 6 buku syair Aceh Sanggamara karangan Teuku Mansoer Leupung yang diterbitkan oleh Teuku Mansoer Foundation di Jakarta tahun 1970.