 | |
|
Hajad hudep he budiman
Nyoe lon peutrang ban sikada
Peutama phon keu untongan
nyakni jalan nyang meulaba
Hana saket sehat badan
keu untongan cit geubangsa
Tuto kata dum gob ikat
beuthat karot pih jiridha
Nyakni untong hana ribot
ateuh patot dum perukara
Pekerjaan le soe turot
nyampang na buet na soe kira
Tan soe rampaih tan soe reubot
tan lam seupot cue hareuta
Seb makanan ngon peukayan
keusosahan tan geurasa
Hate seunang uroe malam
kawom jiran le nyang kaya
Hai nyang meunan galak ensan
meuseuki tan dalam donya
Teutapi na lam tujuan
meuseuki tan taeu nyata
Tan soe tuntut keupapaan
beuthat gobnyan biek aulia
Hana jinoe hajat meunan
akhe gobnyan lam syeuruga
Meuseuki tan niet geuh meunan
bak hai gobnyan leumah nyata
Pike teungku ngon neutimang
meung kon meunan neupubeuna
Nyang keudua geumeuhajad
manyang pangkat bak mulia
Boh meuseuki seubab kuat
boh ngon seubab le hareuta
Keuhinaan tan soe minat
beuthat cacat capiek buta
Beuthat budok peunyaket mar
tan soe kasad keu brok nama
Hana jalan jeh bah jalan nyoe
bak na pujoe ban sikada
Hana bak atra bak buet jaroe
boh bak raghoe peugah haba
Asai bak na nama pujoe
dak han bak droe keu saudara
Bak mulia ban kada droe
beuthat gobyoe buta mata
Peungajaran
Aneuek manyak neupereunoe
bek roh dudoe jih cilaka
Neuseuleuah geunap uroe
bak meubudhoe neubri aja
Buet ngon tuto dum sibagoe
beuthat ragoe neupeulahra
Nafsu keuji dum tiep-tiep syoe
bak seuluesoe dum neupubla
Tingkah laku nyang han meukri
neupeuturi nyang sibeuna
Syarat bek kreueh ngon neutadi
dum ugahri neu useuha
Bek ngon tunu hate beunci
bek ngon camti manyak neudra
Beuthat salah bek leumah ri
akai budi bek neulupa
Bek neucarot muka juah
bek neutukaih ngon mereuka
Bak le balek panyang hilah
syarat beusah bek duseuta
Bek meusulet bak neupeugah
jeud beurakah ban sikada
Meunyo neutem insya Allah
cit meutuah bijeh mata
Peungajaran nyang theuen nafsu
hana le hu gadoh bisa
Peungajaran ureueng palu
gadoh tunu duka cita
Peungajaran nyang boh rindu
malee sipu buet nyang leuta
Peungajaran nibak ma-ku
mise mutu le hareuga
Peungajaran nyang peurintang
nafsu panyang jipeugisa
Peungajaran mise panyang
teumpat tambang nafsu raya
Peungajaran sang meuriam
ngon tapasang musih Cina
Peungajaran sang manikam
ngon nyan padam nafsu hina
Syarat bak na ban atoran
adat reusam tapeunyata
Laba rugoe bak jituban
bak jeud jipham pujoe ceula
Meung na salah sapeue-sapeue
bek tabiyeue tapreh lusa
Bek tapreh jeud meusiluweue
bek tasakeue sang-sang hana
Dudoe han ek taboh pageue
bahya dikeue nyang that raya
Bek tapreh jan teuka ingkeue
mise uleue nyang that bisa
Meunyoe teungku han peuduli
sinan jadi phon cilaka
Phon kreueh ulee tulak deungki
bapa abi jiniet hana
Lalee peusah troih u pasi
meuen gaki ngon boh panta
Bak keude Kleng keude kupi
jak angkot ie keu beulanja
Rukok puteh boh bak bibi
minyeuek wangi bak keupula
Pileh mamplam boh keuleudi
cue boh giri pat na tuha
Cok aneueuk keh peuget judi
job-job bangsi buloh beungga
Rayek bacut jak bak kuli
bak komidi publoe mata
Habeh buleuen jak cok gaji
keu Cek Sitti jibri lanja
Bak meuzina pih ka ahli
bak meujudi cit juara
Lom meuteumeueng pangkat banggi
bajee tari peunoh leuta
Jeb ie arak ngon beurendi
utak meusie sang ka gila
Bek roh meunan he meutuah
beutapapah masa mula
Masa manyak taseuleuah
bak na hilah ngon peulahra
Supaya bak sia-payah
bak meutuah bijeh mata
Lanjut umu Tuhan keubah
meusyehurah mubahgia
Supaya bek teuka rintang
bah lon peutrang ngon neu aja
Ngon peurunoe aneuek badan
phon atoran teungku mita
Supaya bek salah jalan
sang peudoman lam safara
Keu eleumee mise parang
ngon tateubang kayee raya
Neubeuet buku peundidekan
teungku peusan bak pustaka
Ureueng aref po karangan
geupeunan Pura Direja
Limong reutoih peuetploh lapan
seuri nomor nyan lam dafeuta
'Oh lheueh neubeuet eleumee nyan
hanle rintang bak neuaja
Lompih neubeuet dalam kitab
di ateueh bab hai meuganja
Bab horeumat ngon bab adab
sinan le that nyang meuguna
Bak tasawof pham bak cakap
mise kitab geukheuen Ihya
Neupeusaho sikrak sapat
hase nikmat hanle buta
Catatan:
Bait syair di atas adalah bagian 1 dan 2 dari buku syair bahasa Aceh yang berjudul Sanggamara yang dikarang oleh Teuku Mansoer Leupung. Buku kecil tersebut diterbitkan oleh Teuku Mansoer Foundation Jakarta pada tahun 1970.
No comments:
Post a Comment