Sanggamara - Meurunoe

Pelajarilah adat agar kita tidak tersesat

Wajeb tuntut peungajaran
dumna insan agama dara

Hukom adat dum atoran

keu peudoman bek meuriba

Hukom syara' keunai Tuhan
bab seumbahyang ngon puasa

Hatta laen sileungkapan 

maseng jalan ka meuhingga

Furu' limong cuba pandang
leubeh panyang bak ulama

Guna teungku peungajaran

sang lam malam teubiet cahya

Mise suloh ngon lhoh jalan
supaya trang han meutuka

Leumah duroe meujueb manyang

leumah peusan uleue bisa

Meuri pageue mupat kubang
paya ngon blang jeud tabiza

Meuri puteh deungon hitam

nyang geularang meukri tanda

'Oj ka meuri sileungkapan
jeut tatimang rugoe laba

Hana le syok gadoh waham

trang pikeran nur 'arifa

Peungajaran sang keumudoe
ho hajad droe tapeugisa

Seulamat jak troih ngon tawoe

keudeh keunoe han meuriba

Hanle teukong dalam duroe
han mupaloe roh lam bangka

Mise laen le that bagoe

pike keudroe he saudara

Adat

Adat bak Poteu Meureuhom

Neumee ensan bak riwayat
kheuen nek Hajad ureueng tuha

Peutama phon nyankeuh adat

ngon peuteupat dum peukara

Kleng ngon Cina maseng babat
maseng adat dum hana sa

Lon boh dali nak bek silap

tueng ibarat kata maja:

"Laen huteuen, laen peulandok
laen nanggroe, laen acok."

Laen bangsa laen adat

laen teumpat laen raja

Tapi bandum wujud rahmat
jan khuseumat nyan soe publa

Banja adat macam-macam

hana saban jeub-jeub masa

Teutapi dum meuatoran
bhaih geulanggang ngon juara

Bhaih meusabong wase pacang

adat peukan wase rimba

Hak teulangke ngon jak bisan
upah bidan ka meujeumba

Bhaih pumajoh he budiman

adat sinar pi that raya

Jan na teuka wareh rakan
adab bek han he saudara

Shaih keureuja u teulason

teubee meu-on ngon boh angsa

Bu peurakan ngon paga-glong
geundrang ngon gong na peutua

Meuseunujoe bantai suson

adat gampong haloih gasa

Cawan tujoh asoe dalong
cipe lam glong dinab raja

Bhaih pancuri ngon meurampaih

bhaih meumukah ka meuhingga

Bhaih mupake ngon mubantah
tukaih mukaih adat jih na

Geulanggeh blang le Pang Udah

meung jibantah titah raja

Nyankeuh adat ka lon peugah 
kong sileupah hana ngon sa

Meung jilawan jih geupeulet

geupeusaket tueng hareuta

Na geutanom hudep-hudep
na geupiret ngon geusula

Na geuruat geutueng ringget

na geupalet geuboh singkla

Rante beusoe geuboh geundet
tuboh saket jih keunong dra

Habeh musem teuka musem

raja laen ka meutuka

Adat pih ka macam laen
na nyang masen nibak nyang ka

Na nyang mangat hana ceuken

meunan kayem raja muda

Lheueh geutimang geuboh lam ceng
gasa licen raja biza

Dilee geudra jinoe ruat

ban nyang babat teumeureuka

Hukom sula jinoe geuglap
na nyang lambat boh u Jawa

Ureueng nanggroe tan meukarat

nyawong teutap hanle pahna

Nyankeuh he po geukheuen adat
tueng ibarat cok umpama

Phon-phon adat cit jeud keudroe

maseng nanggroe maseng bangsa

Hingga rame asoe nanggroe
po jeh ngon nyoe ka jeud dakwa

Le that pake geunap uroe

hingga dudoe pileh bangsa

Pileh kawom keurabat droe
jipileh soe nyang peutua

Nyang mat adat nyang meubudhoe

'akai sampoe bijaksana

Sinan phon jeud raja nanggroe
troih 'an jinoe that kuasa

Adat Aceh bak riwayat

bacut sapat dudoe teuka

Adat dilee bak jad-bajad
jinoe sahbat tan le rupa

Sopan santon deungon adab

reusam adat ganu-gana

Nyang get geucok sikrak sapat
ban nyang babat ateueh kada

Peutama phon dalam kitab

bangsa Arab nyang peuteuka

Meujeulisan lam bab adab
sinan le that kheuen ulama

Nyang keudua bak Meulayu

nibak Hindu deungon Jawa

Nibak Cina na sigitu
adat Badu ngon Malaka

Joh jeud bangsa ka meujampu

Arab, Badu ngon Manila

Bangsa Jawa ngon Meulayu
le that teungku ureueng teuka

Hingga rame nanggroe makmu

murah breueh-bu mehai lada

Nyankeuh seubab adat karu
barat timu laen lisa

Suson bahsa rab Meulayu

barat timu bacut bisa

Bahsa Arab na sigitu
jampu bawu laen pih na

Bak peukayan dum banlaku

ureueng Hendu nyang peuteuka

Cuba tilek tingkah laku
bajee Badu ladom pih na

Rupa adat le sileupaih

muhakkamah nyang peutama

Mise geubri keubeue mawaih
wase samaih bak boh lada

Ban syarikat kongsi badan

peurusahaan bak keureuja

Adu teuga tuleueng badan
kon pangkai wang nyang geukira

Gale umong tueng haselan

mise hewan dua laba

Mise wase gle ngon peukan
wase pacang bak kuala

Hak geulanggang cuke judi

bandum meukri ka meuhingga

Mise puesah si pancuri
jaroe gaki geukoh dua

Nyang meuzina gilho lam krueng

hukom gantung deungon sula

Jan na salah riyeue geutueng
dum geubulueng ban nyang kada

Adat tuha nan qadimah

nyoe lon peugah lon peunyata

Gleueng suasa meusarongan
nyan peukayan raja-raja

Ureueng nanggroe cit geularang

beuthat gobnyan ureueng kaya

Jinoe teungku mubalekan
maklum tuan nyang mulia

Nyang hadisah baro datang

nyoe lon peutrang keu umpama

Mise bajee uleebalang
sukleuet hitam nyang mulia

Nibak takue boh peuseumen

kasab kuneng ngon boh dokma

Boh bajee sujoe kasab
dua urat sigo puta

Nyampang-nyampang jak meungadap

bri horeumat maulid raja

Ngui bajee nyan geukheuen adat
maseng pangkat ka meuhingga

Cut ngon raya dum ka meuhat

hanle silap tangieng tanda

Puteh kuneng dum ka meukri
keuchiek waki han meutuka

Imeum makam bandum meuri

hanpeue sudi tapareksa

Nyang kayem jeud mutharidah
nyoe lon peugah keu umpama

Jeub-jeub nanggroe meusyeuhurah

si meumukah tueng hareuta

Cok aleumeui bandua blah
lheueh geupeusah geutueng deunda

Geutueng ruwat peue nyang mudah

sang meuih meuntah mupeurmata

Hila keubeue geulanggeh blang
meung krang ceukang jih geusula

Geutueng riyeue teuneuboih nyan

dum nyang reumbang kheuen peutua

Meung na hajad leubeh oanyang
teungku pandang kitab raya

Tuan Snouck po karangan

di dalam nyan geucalitra

De Atjehers nama kitab
na meupat-pat nyang meuguna

Meung na napsu tupeue panyang

lam kitab nyan tapareksa

Nyang maqamah teudong keudroe 
laen naggroe laen rupa

Lon boh mise saboh bagoe

nak seuleusoe bak bicara

Mise pake ureueng di Lhong
bandum kawom prang jipuga

Ngon batee krueng dum jilambong

keunong hidong beukah muka

Pileh batee nyang ugahri
boh lam ali jigeulawa

Jisrom rumoh beukah guci

batee nari troih upara

Nyang di Leupueng jan na pake 
meusapat le dum saudara

Tumbak leumbeng cit ka hase

na nyang beude ladom jiba

Jak prang pageue jikoh pisang
geutot rangkang jambo sira

Geukoh teubee gilho bawang

jitak bangkang timon raya

'Oh lheueh adat beudoh riwang
lheueh nibak nyan tamong tuha

Jak bak raja uleebalang

geupeuseunang ban nyang jeumba 

Lom keu mise gantoe pakat
jeub-jeub teumpat cit hana sa

Nyang maqamah nyankeuh babat

kalon kitab bek meutuka

Le Kreemer na geusurat
saboh kitab cuba baca

Kitab raya lagi cakap

geuboh ngon cap nama raja

Kitab Atjeh nyang geupeunan
di dalam nyan dum aneka

Hukom pukat na di sinan

cuba pandang bek syok sangka

Bandum adat nyang lon kheuen nyan
jinoe tuan le meutuka

Troih kompeni mubalekan

leumah macam laen rupa

Ka geuturot undang-undang
kon le ragam dilee nyang ka

Nyankeuh teungku ka lon peutrang

timang tuan ngon 'arifa

Lanjut baca bab berikutnya Hukom dan Tatimmah 

 

Catatan:

Hikayat di atas adalah bagian 3 dan 4 buku syair Aceh Sanggamara karangan Teuku Mansoer Leupung yang diterbitkan oleh Teuku Mansoer Foundation di Jakarta pada tahun 1970.